Wärte Präsident vom Grosse Gmeindrat
Liebi Parlamentarierinne u liebi Parlamentarier
Wärte Gmeindspräsident, liebi Lis, liebi Gmeindratskollege
Liebi Gescht
Es isch mir äs grosses Aliege hüt euch Stäffisburger Parlamentarierinnen u Parla-mentarier für die stets gueti Ufnahm vo mine, nid immer ganz günschtige Gschäft, ds danke. Ou wenn mängisch d Frage u Ussage vom Parlament kritisch si gsi ha i immer wieder äs grosses wohlwolle für Gschäft us mim Departement gespürt.
I au dene Jahr het ds Parlament zwöi Mau äs Gschäft vo mir zur überarbeitig zrügg gwiese, (d Schwäbisstrasse u d Hartlisbergstrass) u beidi Mau si im zwöite Alouf die notwändige Kredite für di Gschäft beschlosse worde.
Aber ou bi ganz grosse Gschäft wie em «Hochwasserschutz u dr Längsvernetzig Zulg» wo d Gemeind Stäffisburg rund CHF 4 Mio. muss dra zahle, ha i di grossi Unterstützig vom Parlament gspürt u das het de ou ghulfe, dass d Volksabstimmig, mini einzige, dütlech mit meh aus 70 % Ja-Stimme isch agnoh worde.
Ganz härzlech danke i euch u au eune Vorgängerinne u Vorgänger im Parlament für ds grosse Vertroue wo i immer wieder ha dörfe gspüre.
Ganz härzlich möcht i ou aune mine Mitarbeiterinnen u Mitarbeiter uf dr Abteilig Tiefbou/Umwält mit em Martin Deiss aus Abteligisleiter ganz fescht MERCI säge. Dank ihrere grosse Unterstützig ha i mini Gschäft guet kennt u ha se chönne im Parlament u im Gmeinderat unterbreite u mi ou derfür isetze.
I ha die Zämearbeit mit mire Abteilig immer megagschätzt. Für üs isch ou immer klar gsi, dass mir mit emene Gschäft ersch denn i Gmeindrat gö, wenn mir üs voll u ganz einig si gsi. Das het sich i au dene Jahre sehr guet bewährt.
I dä dank wett i aber ou d Abteilig Präsidiales mit em Gmeindschriber Rolf Zeller, sire Stellverträtere dr Ramona Graber, dr Marianne Neuhus, dr Sandra Moser u früecher dr Erika Furrer ischliesse. Ou uf si ha i mi geng chönne verlah. Sie si mir mit Rat u Tat bigstange. Sigs bi juristisch schwierige Gschäft oder eifach wie hüt am Abe mit em Beamer. Die gueti Art vo dere Zämearbeit, het üs de ou bim düre füehre vom Jodlerfescht im Jahr 2016 ghulfe u no meh zämegfüehrt.
Danke wott i aber ou dr Sozialdemokratische Partei Stäffisburg, wo mi i au dene Jahr immer wieder unterstützt u ou immer wieder füre Gmeinderat uf d Lischte setzt het. D’ SP isch immer mini politische Heimat gsi u wird se ou immer blibe, wiu für mi d Mönsche wichtig si u ganz bsunders die wo nid uf dr Sunnesyte vom Läbe stöh. Üsi Gsellschaft cha nume denn guet funktioniere, «wenn’s denne guet geit, wos weniger guet geit». Wie dr Mani Matter i eim vo sine Lieder beschriebe het.
Danke tue i ou aune Stäffisburger Stimmbürgerinne u Stimmbürger, wo mir immer wieder hei ds Vertroue gschänkt u mi i Gmeindrat gwählt hei. Si hei mir ermüglichet mire öppis ds mache, wo i immer gärn u mit viu Freud gmacht ha.
U last but no least danke i ganz härzlech mir liebe Frou Sandra wo mir ermüglechet het au di Jahr im Gmeindrat vo Stäffisburg chönne ds politisiere u mir ganz viu Arbeite abgnoh u mir dr Rücke freighalte het. Aber nid nume das, d Sandra isch i au dene Jahr mini Politberatere gsi u het mi mängisch dervor bewahrt, dass i ines Fettnäpfli gstange bi.
Ja, i ha sehr gärn politisiert u bi sehr gärn im Gmeindrat gsi.
I würds o no di nächste 20 Jahr gärn mache. Aber itze isches haut d Zyt uf ds höre. Me söu denn ufhöre, wenn’s am schönschte isch u me söu nid warte, bis aui hoffe, dass er itze de ändlech einisch Zrügg tritt. Merci, dass i so lang ha dörfe im Gemeindrat si.
Euch aune wünsche i witerhin viu Freud u Spass bim politisiere.
Mir Stäffisburgerinne u Stäffisburger si froh, dass dir das machet u Zyt derfür isetzet. Fahret i däm Sinn u Geischt witer u lueget zu «mim Stäffisburg».
Üsi Gmeind u aui Stäffisburgerinne u Stäffisburger hei’s verdient, dass sie ihre aständige Gmeind dörfe wohne u läbe, wo guet zu aune gluegt wird u für d Mönsche im Dorf u ds zäme läbe investiert. Es isch schön ds Stäffisburg dörfe ds wohne u das söu so blibe.
Ja, äs gäb no viu ds säge, wenn me wüsst was, drum höre i itze gschider uf, Danke euch aune no einisch vo Härze für aues u dä wunderschön Abschied wo dir mir bereitet heit.
MERCI
